"Nanonood lang po ako ng TV...tapos bigla na lang siyang namatay."

Yan ang salaysay ni Weena, hindi niya tunay na pangalan, na siyang nakasaksi ng mga huling sandali ng aming matalik na kaibigan, na itatago na lamang natin sa pangalang "TV".

Naganap ang kalunos-lunos na pangyayari bandang alas-tres ng hapon kanina, habang kami ng aking asawang si Rose ay kasalukuyang nahihimbing sa aming pagsi-siesta.

Di na namin naabutang buhay ang aming kaibigan.

Ang kanyang mga labi ay maaaring dalawin dito sa aming tahanan. Kini-kinita kong matagal-tagal din namin siyang tititigan ng may lubos na kalungkutan, kasabay ng malalalim na mga buntong-hininga, bago namin siya lubusang alisin sa kanyang kinalalagyan.

Paalam, TV. Lubos mo kaming pinaligaya sa'yong sasandaling pakikipisan sa aming sambahayan. Hinding-hindi namin malilimutan ang mga halos-walang-patlang na mga oras ng aliw at kaligayahang idinulot mo sa aming buong pamilya, lalo na nung kami ay nag-marathon ng halos 3 seasons ng '24'.

Nawa'y maligaya ka na't payapa sa iyong bagong kinalalagyan.

Sa lahat ng mga nakiramay, maraming salamat po.

Mula sa aming munting tahanan, ito po si Jesse Dedel, nag-uulat.

Pasok, Rodel...>eheste!< Claud!